القَطّوس عَندُ شلاغِم فوق فُمُّ وُ عينيه وُ في دَڤـنونةُ.
شّلاغِم القَطّوس مُهِمّين بَرشَة كيما حاسَّة الشَمّ وُ النّظَر، بهاك الشّلاغِم يِحِسّ القطوس بكُلّ تَحريكَة بِالأخصّ اللّي ما يُفطُنش بيها الإنسان وُ يِمَكنوه زاد مِن إنُّ يِسطاد وَفي بَعض الحالات كان فَمّ خطَر بِش يُهرُب. الشّلاغِم هي اللّي تَعطيه القياس، بيهُم يَعرِف روحُ كان ينَجِّم يِتعَدّى مِن بلاصَة ضِيّقَة.
القطاطس يِستَعملوا زادة شلاغِمهُم بِش يِعبّروا على أحاسيسهُم معَا البَشَر وَ إلاّ معَا حَيوانات كيفهُم.
حَتّى ذيل القَطوس مُهِمّ هُوَ اللّي يِخَلّيه مِتوازِن بِالأخَص وَقتِلّي لازمُ يِنَڤز وُ يِتشَعبِط وَ إلاّ كان طاح بِش يلقِف روحُ.
و الذّيل كيما الشّلاغِم يِمَكّنوا القَطّوس مِن إنُّ يِعَبِّر عَلى مشاعرُ
+😉: حاسّة الشَمّ عَند القَطّوس مِتطَوّرَة بَرشَة، عَندُ 60 مليون خَليَّة شَمِيّة مَعنِتها 3 مَرّات أكثِر مِالإنسان .