عام 1976 قَرِّر المُخرِج جورج لوكاس إنُّ يِصَوِّر في تونِس أَوّل ثُلاثِيَّة متاع أفلام ” حرب النجوم” « star wars » (أمَل جديد، الإمبراطورية ترَجَّع الضَّربَة ، عودة الجيداي)
البَطل متاع الأفلام هَذي هُوَ لوك سكاي وُلكِر اللّي يِعيش في كَوكِب قاحِل وُ شايِح إسمُ طاطْوينْ وُما فَمّ حَتّى أَدنى شَكّ اللّي الإسم هَذا يِذَكَّركُم بإسم بلاصَة مَعروفَة في تونِس وُ اللّي هِيَ طاطاوين .
المَلحمَة هَذي عَرفِت شُهرَة كبيرة ، شُهرَة عالَمِيَّة وُ قَرِّر جورج لوكاس بِش يِرجع يِصَوِّر الحَلقات متاع الثُّلاثِيَّة الثانِيَة في نَفس البلايِص(تهديد الشبح ، هجوم المستنسخين، انتقام السيث)
جورج لوكاس تِبهر بِالمناظر متاع الجَنوب وُ هَذاك علاش إختاربش يِصَوِّر حاجَة في كُل بلاصَة ، مثلا إستَعمِل بيوت أوتيل إسمُ سيدي إدريس في مطماطة بِش يِمَثِّل ديكور دار لوكا عَلى خاتِر بيوت الأوتيل هَذا مَحفورة تَحت الأرض وُإختاروا زادَ بِش يِصَوّروا المدينة متاع لوكا في ضَواحي توزِر وُ نَفطة .الضَيْعة متاع عايلِة لارس في شَطّ غَرسة وُ في شَطّ الجريد وُ إستَعملوا زادَة بلايص كيما جبل سيدي بوهلال وُ عُنق الجمل بِش يِمَثّلوا فيها الحُروب.
جورج لوكاس تِبهِر زادَة بِالقصور كيما قصَر مدنين وُ قصر حدادة وُ قصر ولد السلطان اللّي يِستَعملوهُم أَهل المِنطقة باش يِخزنوا القَمح و البُذور.
وُ عِجبِتُّ بَرشَة جزيرة جربة و سيدي جمور .
+😉: فَمَّ نادي إسمُ ” stars wars tunisia ” فيه جماعَة مُعجبين وُ يِحِبّوا حَرب النّجوم وُ يِحاولوا يِحَيّيوا ذِكرى الفيلم وُ يَعملوا نشاطات عَلى الفيلم، مَثلا في شهَر ماي 2022 حَسّنوا ” ضَيْعِة لارس ” في بَلديّة نفطة .