مدينة تونس وُ الحِرَف المَوجودَة فيها
مبَعد سقوط قَرطاج في القَرن 11 وَلّات تونس عاصمَة البلاد.
تطَوّرِتْ و تحَسّنِتْ المدينة تَحت تَأثير الشُّعوب وُالحَضارات اللّي مشاوا وُ جاوا عليها وُ وَلاّت مِن أَهَمّ مُدُن العالِم الإسلامي.
المدينة العَربي كيما نسمّيوْها تَوَّ مَوجودة مِن عام 698.
فَمَّ أسوار تَحمي المدينَة سور أُوّل وُ سور ثاني، السّور لُوّل بَرّاني يُدخلولُ مِالأبواب كيما باب جديد وُ إلاّ باب بحر وُ باب سعدون وُ غيرُ وُ سور دَخلانِي يِحَصّنوا بيه المدينة، كيما يقولوا زيادة الخير ما فيها ندامَة.
المدينَة العَربي مدينة فيها كُلّ شَيْ : المدارس وُ المكاتب وُالمتاحف وُ المطاعم وُ القهاوي .فيها زادة بَرشة جوامَع أكثر واحد معروف فيهُم هُوَ جامِع الزيتونة.
وُ نِلقاوا فيها زادَة أسواق تِتقَسّم حَسب اختِصاص الحِرفيّين.
وُعَندهُم نِظام خاصّ بيهُم مَثلا الحوانِت اللّي دايرَة بجامَع الزيتونة حوانِت متاع صناعات ما توَسَّخش وُ ما تَعمَلش حِسّ مِثال ” سوق العَطّارين” وُ “سوق الحرير” وُ “سوق الشواشين” وُ “سوق البِركة” و أبعَد شوَيَّة “سوق الحَدّادين” و إلاّ “سوق الدباغين”….
+ 😉المدينة العَربي فيها حاجَة ما تقِلِّش على 700 مَعلَم تاريخي.النِظام اللّي مَوجود في المدينة و الحِرف المُمَيّزَة اللّي فيها خَلاّوا المدينَة العَربي تِتسَجِّل عام 1979 في قائِمة التُّراث العالمي لِليونسكو عَلى خاتِرها وَحدَة مِالثمانيَة مَعالم الخارقَة لِلعادة في البلاد التُونسِيَّة.